Нойтон дипломынхоо сураг сонссон тэдний баяр хөөр нь дундарчээ

            “Оньсыг тайлан эрдмийн үүдийг нээж өгсөн“ багш болох оюутнууд өнөөдөр дипломоо гардацгаах байв. Гэтэл нойтон дипломыг хаттал хүлээх болжээ. Харин тэд “Хонхны баяр”-аа хоосон буюу дипломгүй тэмдэглэж байна. Алдарт Багшийн дээдийн оюутнуудын баяр хөөр нь дундуур байгаагийн шалтгаан нь тээвэрлэлтийн явцад норчихсон диплом гэнэ. Өнөөгийн нэр МУБИС-ийн 2000 оюутан ийнхүү урам муутайхан байна. Тэдний гардаж авах дипломыг хэн нэг  нь  эрх мэдлээ ашиглаж БНХАУ-д хэвлүүлсэн аж.

           Уг нь дүрэм журмынхаа дагуу бол дипломыг Монгол Улсын үнэт цаасны компаниар хэвлүүлэх ёстой гэнэ. Гэтэл МУБИС-ийн ректор юм уу хэн нэгэн удирдлага нь  БНХАУ-д хэвлүүлэх болсноос л ийм байдалд хүрчээ.

            Буруу дээрээ булцуутай гэлтэй, үйлдвэрээс гарсан дипломыг тээвэрлэх явцад норгож баларсан байна. “Шалаар л нэг Саша ... “ гэдэг орос онигоо шиг тус сургуулийн хонгилын шалаар нэг диплом дэлгэжээ. Диплом норсноос гадна алдаатай хэвлэсэн, дүрэм журам зөрчиж Хятадад хэвлүүлсэн зэргийн хариуцлагыг эрхэм ректор, эрхтэн дархтанд  хаанаас хэрхэн хүлээлгэх бол оо?!

А.Хишиг

WWW.ZINDAA.MN