ШУУРХАЙ МЭДЭЭ: Маргаашийн мэтгэлцээнийг цуцаллаа

           Маргааш Монгол Улсын Ерөнхийлөгчийн сонгуульд нэр дэвшигчдийн хооронд "Хууль эрх зүй-Шударга ёс" сэдэв дор анхны мэтгэлцээн явагдах байсан. Тэгвэл дөнгөж сая Монголын телевизүүдийн холбооноос мэдээлэл хийж маргаашийн мэтгэлцээнийг цуцласан талаар хэллээ. Учир нь, Ардчилсан намаас нэр дэвшигч Х.Баттулга мэтгэлцээнд оролцох боломжгүй гэсэн байна.

            Ийн нэр дэвшигчдийн халз мэтгэлцээн хоёр дахь удаа хойшлов. Ардчилсан намын зүгээс "“Монгол HD” телевизээр халз мэтгэлцээнийг дамжуулбал оролцоход бэлэн, учир нь МҮОНРТ эрх баригчдын хяналт байдаг" гэсэн юм.

            Харин Монголын телевизүүдийн холбооны удирдлагууд хэвлэлийн хурлын үеэр “Монгол HD телевиз манай гишүүн байгууллага. Гэтэл АН зөвхөн энэ телевизийг товойлгон, бусад телевизүүдийг худалдагдсан мэтээр мэдээллээ. Биднээс уучлал гуйна гэж найдаж байна” гэжээ.

            Дашрамд дурдахад, Монгол Улсын Ерөнхийлөгчийн сонгуульд нэр дэвшигчдийн анхны мэтгэлцээн энэ сарын 11-ний өдөр болох байсан ч АН-аас нэр дэвшигч Х.Баттулга урьдчилан хэлээгүй учир оролцох боломжгүй тухай тус намаас мэдэгдсэн байдаг.

ЭХ СУРВАЛЖ: http://eagle.mn/r/31035